ژیانی خانەوادەی شەهیدەكان، مێژوویەكی پڕ لە شكۆ و سانسۆر

مێژوونووسەكە دەربارەی مێژوو دەدوا، دەیوت (سلێمانی بەهۆی هەڵكەوتەی سروشتی جوانی شارەكەیەوە و بە هۆكاری ئەوەی لە نێو زنجیرە چیاكاندابووە، شار پێویستی بەوە نەبووە دەسەڵاتی بابانییەكان هیچ قەڵایەكی بۆ خۆپاراستن تێدا دروست بكەن).
بەدەم گوێگرتن لە شیكردنەوەی ئەو بابەتەوە، خەیاڵم بردمییە نێو وێنەكەی خاڵە ئایارم، شەوان زوو زوو باوكم بە دزییەوە، لە دوای كوژانەوەی گڵۆپەكان، بەدیار وێنەیەكەوە رادەما، وێنەی پیاوێكی چاو بڕۆ رەشی رەنگ گەنمی كە كراسێكی شینی ئاسمانی لە بەردابوو، باوكم تا درەنگانی شەو دەگریا، كاتێك دایكم دەیویست ئارامی بكاتەوە، باوكم دەیوت ئاخر چۆن نەگریم شار حەڤدە قەڵای رووخا!. 
لەنێوان فرمێسكە شاراوەكانی باوكمدا هەمیشە بۆ حەڤدە قەڵا دەگەڕام!، ناچار دەچوومەوە سەر وێنەكە كە لەو رۆژانەدا لە ژووری میوان هەڵمانواسیبوو، هەندێك شەویش لە باوەشی باوكمدا رۆژی دەكردەوە، ئەوكاتە، من لە وێنەكەدا تەنیا پیاوەكراس شینە چاو و بڕۆ رەشەكەم دەبینی، هەرچی میوانێكیشمان دەهات لە پوور و مام و دراوسێ و خزم و ناسیاو، تەماشایەكی وێنەكەیان دەكرد و دەیانوت (قەڵاكەمان رما و پشتمان شكا). 
رۆژگار دەهات و دەچوو، ئێمە، ژنان و كچانی خێزان و خانەوادەی حەڤدە شەهیدەكەی قڕگە، حەڤدە قەڵاكەی سلێمانی، تادەهات زیاتر لە سەختیی ئەوكارەساتە، گەورەیی ئەو شەهیدانە تێدەگەشتین. 
ئێمە وەك ژن، تەنیا خەمی شەهیدبوونی (حەڤدە بەور) غەمباری نەکردبووین، ئێمە هەڵگری هەموو مۆڕاڵێكی بەرزی ئەوكاتی كۆمەڵگەی خۆمان بووین و لێیشی بەرپرسیار بووین.
ئێمە حەڤدەجار قوربانی بووین
ئێمە حەڤدە جار دەبوایە بیر بكەینەوە تا بتوانین بچینە بازاڕ یان بچینە میوانی، حەڤدە جار زیاتر بیر بكەینەوە لەگەڵ كێ قسەبكەین؟، ئاخر تۆ ئەوكات لە خێزانی شەهیدێك بوویتایە، بەرپرسیارێتی زیاترت لەسەر دەبوو.
دەبوو حەڤدەجار جلەكانمان پۆشتەتربن، نەدەبوو یەخەی كراسەكەمان (حەوتی)بێت، دەبوو حسابێكی وردیش بۆ قۆپچەی كۆتایی یەخەمان بكەین، لە هاتنە دەرەوەدا حەڤدە جار دەچووینە بەر ئاوێنەكە و سەیرمان دەكرد و دەگەڕاینەوە.
سەبارەت بە ئێمە، ژنانی خانەوادەی حەڤدە شەهیدەكەی قڕگە، حەڤدە جار كۆبوونەوە دەكرا لەسەر ئەوەی لە دوای خوێندنی ئامادەیی بچینە زانكۆی موسڵ یان بەغدا و لە حەڤدە هەمین كۆبوونەودا، بڕیاری نەچوونمان بۆ دەردەكرا. 
ئێمە، لە هەر ساڵێكدا حەڤدە جار نەماندەتوانی بچینە سەیران و گەڕان، نەكا بەعسییەك، خۆفرۆشێك چاوی پێمان بكەوێت، لە مانگێكدا حەڤدە جار بە بیانووی ئەرخەوان لێكردنەوەوە، دەچووینە گردی سەیوان تا دڵنیابین گۆڕی ئازیزانمان پارێزراون.
كە دەگەیشتمە گۆڕستانی سەیوان، لە دڵی خۆمدا دەجارم بە مێژوو نووسەكە دەوت: تەمەڵی مەكە، خوێنەواریت بەرەو پێشتر بەرە، تۆ دەتوانیت  جوانتر بگەڕێیت، لێرەش حەڤدە قەڵا هەیە.
ئێمە و هەموو شار حەڤدە جار پێكەوە بیرمان  دەكردەوە و خەباتمان دەكرد، خەباتی ئەوكاتەی ئێمە خەباتێكی هەرەوەزی گشتگیری پڕ جۆش و خرۆش، خەباتێك بۆ ئازادی و مافی چارەنووس بوو.
ئێمەی ژنانی خانەوادەی شەهیدان، حەڤدە ماڵ لای راست و حەڤدەماڵی لای چەپمان تێدەپەڕاند و نە دەبوو سەیری كەس بكەین، حەڤدە جار لە ساڵێكدا چەوەكانی سەر گۆڕەكانمان رەنگاوڕەنگ و نوێ دەكردەوە، بەڵام نەدەبوو جگە لە كراسی رەش، هیچ رەنگێكی تر بپۆشین.
ئێمەش حەزمان دەكرد حەڤدە نامەی دڵداری لە قاوغەشقارتەدا وەربگرین، بەڵام حەڤدە جار شكۆی شەهیدەكانمان نەیان دەهێشت، هەركەسێكت خۆش دەویست، دەبوو حەڤدەجار لە دڵی خۆتدا، بینێژیت.
حەڤدە خێزان بووین لە جەستەی یەك ئازاردا
ئێمە، هەموو رۆژێك حەڤدە جار دەبوو بیر بكەینەوە كە ئەمڕۆ لەگەڵ كێ قسەمان كردووە و بۆ قسەمان كرد، بۆ سڵاویان لێكردین بۆ وەڵاممان دایەوە، حەڤدەجار دەمانپرسی وەڵامەكە راست بوو یان هەڵە؟!.
ئێمە دەبوو حەڤدەجار لە خەڵكی شۆڕشگێڕتربین و حەڤدەجار بە هەڵوێستتر بووین، حەڤدە جار كەمتر قسەبكەین و حەڤدە جار كەمتر پێبكەنین، حەڤدە جار لە پێش خەڵكەوە لە ماڵبین و حەڤدەجار زووتر لە خەو هەڵبسین، حەڤدەجار پێش هەموو كەس لە پشتی دەرگاوە لە ترسی قواتخاسە خۆمان بشارینەوە، حەڤدە جار زیاتر بەرپرسیار بووین لە راپەڕین و قڵیشانەوە، حەڤدەجار زیاتر بریندارمان تیمار دەكرد و فیرارمان دەشاردەوە.
ئێمە؛ حەڤدە جێگەی نهێنی پەرتوك و نامەی پێشمەرگە و كونە هەتیتەمان لە ماڵی باپیرانمان هەبوو، ئێمە تەنیا جەستەی حەڤدە مرۆڤمان دیاربوو كە شەهیدن، دەی ئێمەش شەهیدبووین، شەهیدی دەستی ئەو نەریتە، ئاخر ئێمە لە لایەك رۆحەكانمان بەخشیبوو، لەلایەكی دیكەوە رۆژانە و هێواش هێواش دەبووینە شەهیدی دەستی ئەو كەلتورە كە هەرچیمان دەكرد دەیانوت (ئێوە خێزانی شەهیدانن، نەكەن، نابێت، ناكرێت، عەیبە، ئێمە دیارین، ئێمە دەناسرێین)، ئای ناسین!، تۆ حەڤدە جار لە نەناسراوی تاڵتریت، ئای تاڵی، تۆ حەڤدەجار لە ژیانی ژنانی خانەوادەی شەهیدان، شیرینتریت.
تێبینی/
1 – ئەم دێڕانە، پێشكەشە بە خانەوادەی حەڤدە شەهیدەكەی قڕگە و بەتایبەتیش بە خەمی ژنانی كەسوكاری ئەو پۆلە شەهیدە. 
2 – شەهید ئامانج عەبدوڵڵا محەمەد ناسراو بە ئایار، یەكێكە لەو قەڵایانەی شار، پورزام بوو، یادی ئەو و هەر حەڤدە شەهیدەكەی قڕگە، بەرز رادەگرم.