بەیانیان کە لە خەو هەڵدەستم!
هەولێریی هەر سرووشتی وایە بەیانیان کە لە خەو هەڵدەستێ، وەک ئەوەیە تاکو چواری بەیانی لە گۆڕستان خەریکی مردوو ناشتن بووبێ، ئینجا بە درەنگەوە هاتبێتەوە و چەند سەعاتێک نووستبێ!
بۆیە زۆرجاری وا هەبووە، بەیانی زوو چوومەتە ناوبازاڕ، بزانم خەڵکی دیکەش وەک خۆم وان! سەیردەکەی هەمووی مڕوومۆچ و بێتاقەت، لەکاتێکدا، هەموو بەیانییەک تازەبوونەوە و ژیانێکی نوێیە و دەبێ مرۆڤ دڵخۆش بێ!
بەهەرحال، بەیانیان کاتێ هەڵدەستم، بەرداخێک ئاو و میوەیەکی ناوسەلاجەکە دەخۆم، تاکو تۆزێ جەوم دەبێ و مۆبایلەکە دەهێنم!
یەکڕاست دەچمە سەر تەماشاکردنی ژمارەی ئەمڕۆی کوردستانی نوێ! سەیرە ها! نە بابەتێکم ناردووە و چاوەڕێی بڵاوبوونەوەی دەکەم، نە ڕۆژێک لەوێ کارم کردووە و سۆزم بۆیان هەبێ، هەر لەو گۆڕەی ئەو ڕۆژنامەم خۆشدەوێ!
بیرم لێکردۆتەوە، لەوانەیە هۆکارەکەی ئەوەبێ، تاکو ئێستا شتی زۆر جددی و خەڵکی زۆر ڕاقی تێدا دەنووسن و نەبۆتە بەشێک لەم پڕووپووچییەی ژیان!
کوردستانی نوێ، وەک ئەو منداڵانەی قۆناغی سەرەتایی دەبینم، کاتێک لە بەیانیانی ساردوسڕ، بەخۆیان و جانتای پشتیانەوە، ورد ورد بەرەوە مەکتەب هەنگاو دەنێن!
هەم دیمەنی منداڵەکان و هەم دەرچوونی هەر ژمارەیەکی کوردستانی نوێ، وەک بەردەوامی ژیان دەبینم!
