ئامارێکی شۆکهێنەر؛ هەر هاونیشتمانییەک ڕۆژانە 400 لیتر ئاو بەکاردەهێنێت
پووختەى هەواڵەکە
- پشکی ئاوی ڕۆژانەی هەر هاونیشتمانییەک ژمارەیەکی پێوانەیی تۆمار دەکات.
- زەنگێکی ئاگادارکردنەوەیە بۆ مەترسییەکانی بەفیڕۆچوونی سامانی ئاو.
- ستاندارى نێودەوڵەتى 160 لیترە.
نوێترین داتاى بەڕێوەبەرایەتیی گشتیی ئاو و ئاوەڕۆی هەرێمی کوردستان بۆ کەناڵ8 نێردرا کە ئاماژە بە بەرزبوونەوەى بەرچاوى ڕێژەى دابین و بەکارهێنانى ئاو لەلاى هەر تاکێک دەکات کە دوو هێندەی ستانداردە نێودەوڵەتییەکانە.
وردەکارى ڕاپۆرتەکە:
- بڕی ئاوی دابینکراو بۆ هەر تاکێک لەنێوان 350 بۆ 400 لیتردایە لە ڕۆژێکدا.
- کەمترین ئاستی پێشنیازکراوی ڕێکخراوی تەندروستیی جیهانی 160 لیتر بۆ 200 لیترە.
- قەبارەی ئاوی دابینکراو دەگاتە 200 لەسەدی پێوەرە بنەڕەتییە نێودەوڵەتییەکان.
- دوو هێندەی ئەو بڕەی کە دامەزراوە جیهانییەکان بۆ ژیانی ڕۆژانەی مرۆڤ بە پێویستی دەزانن.
هۆشداریى دەدرێت
بەڕێوەبەرایەتیی گشتیی ئاو و ئاوەڕۆی هەرێمی کوردستان، ئەم ئامارانە وەک بەڵگەی توانای بەرزی تۆڕەکانی بەرهەمهێنانی ئاو دەبینێت، بەڵام هاوکات هۆشداریی دەدات کە ئەم قەبارە بەرزەی بەکارهێنان لە ناوچەیەکدا کە ڕووبەڕووی لێکەوتەکانی گۆڕانی کەشوهەوا، کەمبارانی و دابەزینی ئاستی ئاوی ژێرزەوی دەبێتەوە، مەترسییەکی گەورەیە بۆ سەر ئاسایشی ئاو.
بە پشت بەستن بە لێکدانەوەى شارەزایان، بەڕێوەبەرایەتییەکە جەخت لە پێویستیی چاکسازیی ستراتیجی لە تۆڕەکانی دابەشکردن، دانانی پێوەری زیرەک و بڵاوکردنەوەی هۆشیاریی کۆمەڵایەتی دەکاتەوە تاکو هاوسەنگی لە نێوان بەرهەمهێنان و بەکارهێنانی ڕاستەقینەدا بەرقەرار بێت
