جێگری سەرۆکی هەرێم لەگەڵ کونسوڵی گشتیی نوێی ئەڵمانیا کۆبووەوە
شێخ جەعفەر شێخ مستەفا و کریستیان ئۆلکفە
ئەمڕۆ سێشەممە 25ى8ى2026 شێخ جەعفەر شێخ مستەفا، جێگری سەرۆکی هەرێمی کوردستان پێشوازییکرد لە کریستیان ئۆلکفە، کونسوڵی گشتیی نوێی ئەڵمانیا لە هەرێمی کوردستان.
لە کۆبوونەوەکەدا جێگری سەرۆکی هەرێم، بەخێرهاتن و پیرۆزبایی دەستبەکاربوونی لە کریستیان ئۆلکفە، وەک کونسوڵی گشتیی ئەڵمانیا لە هەرێمی کوردستان کرد و هیوای سەرکەوتنی لە ئەرکەکەیدا بۆ خواست، هەروەها پاڵپشتی هەرێمی کوردستانی بۆ زیاتر پەرەپێدانی پەیوەندییەکانی نێوان ئەڵمانیا و هەرێمی کوردستان، دووپات کردەوە.
لای خۆیەوە کریستیان ئۆلکفە، کونسوڵی گشتیی نوێى ئەڵمانیا، وێڕای دەربڕینی خۆشحاڵیی خۆی بە ئەرکە نوێیەکەی لە هەرێمی کوردستان، جەختی لە گرنگیی بەردەواميی پەیوەندییە دیپلۆماسی و هەماهەنگییە مرۆییەکانی وڵاتەکەی لەگەڵ هەرێمی کوردستاندا، کردەوە.
