سەرۆکی حکومەت دۆخی پارێزگای سلێمانی لەگەڵ پارێزگار تاوتوێ دەکات

سەرۆك وەزیرانی هەرێم پەیوەندی بە پارێزگاری سلێمانییەوە دەكات بۆ بەدواداچوونی ئەو دوو ڕووداوی ئاگركەوتنەوەیەی شەوی ڕابردوو لە تانجەرۆ و ئەم ئێوارەیە لەناو بینای پارێزگا ڕوویاندا.

ماڵپەڕی فەرمی حكومەتی هەرێم بڵاویكردەوە، بۆ بەدواداچوونی ڕووداوە نەخوازراوەکانی ئاگرکەوتنەوەی دوێنێ شەو و ئەمڕۆی شاری سلێمانی، ئێوارەی ئەمڕۆ سێ شەممە 8/18، مەسرور بارزانی، سەرۆکی حکومەتی هەرێمی کوردستان، لە پەیوەندییەکی تەلەفۆنیدا لەگەڵ هەڤاڵ ئەبووبەکر، پارێزگاری سلێمانی، لە بارودۆخی سلێمانی پرسی و نیگەرانیی خۆی لە کەوتنەوەی ئەو ئاگرانە دەربڕی.

ڕاشیگەیاندووە، پارێزگار و بەرپرسانی شارەکەی ڕاسپارد، کە ڕێکارەکانی پاراستنی سەلامەتیی گیان و ماڵی هاووڵاتییان توندتر بکەن و لەمبارەیەوە هەموو هاوکاری و پشتیوانییەکی حکومەتی بۆ پارێزگەی سلێمانی دووپات کردەوە.

سەرۆکی حکومەت هەروەها هیوای چاکبوونەوەی خێراشی بۆ ئەو هاووڵاتییانە خواست کە بە هۆی ئەم ڕووداوانەوە بریندار بوون.