وردبینی لە 70 هەزار فۆڕمی حەج دەکرێت
بەڕێوەبەرایەتیی گشتیی حەج و عەمرە لە وەزارەتی ئەوقاف و کاروباری ئایینی رایدەگەیەنێت، پڕۆسەی وردبینیکردن لە فۆڕمی داواکارانی حەج بەردەوامە و تاوەکو ئێستا نزیکەی 70 هەزار هاووڵاتی فۆڕمی ئۆنلاینیان بۆ حەجی ساڵانی 2025 و 2026 پڕکردووەتەوە.
بەپێی زانیارییەکان تیمێکی تایبەت و پسپۆڕ رۆژانە پشکنین بۆ زانیاریی فۆڕمەکان دەکەن و پرۆسەکە بەم شێوەیە بەڕێوەدەچێت:
دوای پڕکردنەوەی فۆڕمەکە، یەکەم ئاگاداری بۆ داواکار دەچێت، ئەگەر فۆڕمێک گرفتی تێدابێت، راستەوخۆ خاوەنەکەی ئاگادار دەکرێتەوە تا بیچەسپێنێت و چاکی بکاتەوە.
دوای پشتڕاستکردنەوەی زانیارییەکان، وەڵامەکە بۆ داواکار دەگۆڕێت و دەچێتە قۆناغی کۆتاییەوە.
بەڕێوەبەرایەتیی حەج و عەمرە دڵنیایی دەداتە هەموو هاووڵاتیان کە تەواوی ئەو 70 هەزار فۆڕمەی پڕکراونەتەوە وردبینییان بۆ دەکرێت و هیچ داواکارێک بەهۆی دواکەوتنی پشکنینەوە لە تیروپشک بێبەش نابێت.
داواکاران تاوەکو کۆتایی رۆژی 10ی ئاب دەرفەتیان لەبەردەمدایە بۆ پڕکردنەوەی فۆڕمی ئۆنلاین و دوای تەواوبوونی تەواوی پرۆسەی وردبینیکردن، وادەی تیروپشکی گشتی بۆ دیاریکردنی ناوی حاجییان رادەگەیەنرێت.
