لە سلێمانى مۆلیدەکان کەى هەڵدەکرێنەوە؛ بەرپرسان وەڵام دەدەنەوە؟
پووختەى هەواڵ
- خاوەنى مۆلیدەکان چەندین مەرج و داواکارییان هەیە.
- تاوەکو بەیانیى ئەمڕۆ ڕێککەوتن نەکراوە بۆ هەڵکردنەوەى مۆلیدەکان.
- خاوەن مۆلیدەکان داواى گرەنتى و هاوکارى دەکەن.
شەوى ڕابردوو لە قایمقامیێتى سلێمانى تاوەکو درەنگانێکى شەو لایەنە حکومییەکان و نوێنەرانى کۆمەڵەى مۆلیدە ئەهلییەکان لە کۆبوونەوەدا بوون، بەڵام نەگەیشتنە ڕێککەوتن، هۆکارەکەشى مەرج و داواکارى خاوەنى مۆلیدە ئەهلییەکان بوو.
فازڵ عومەر، قایمقامى سلێمانى بە وەکالەت:
- خاوەن مۆلیدەکان داوایان کرد 100 کاتژمێر پێشەکى پارە وەربگرین.
- هەوڵماندا چارەسەر بخەینەڕوو، بەڵام ئەوان قبووڵیان نەبوو.
- سوپاسى ئەو خاوەن مۆلیدانە دەکەین کە مۆلیدەیان هەڵکردووە.
- گوتمان ئیش بکەن دواى مافى خۆتان وەربگرن.
سەرۆکى کۆمەڵەى مۆلیدە ئەهلییەکانى سلێمانى:
- کارەباى سلێمانى نەچووە ژێر بارى هیچ بەرنامەیەکى دیاریکراو بۆ ئەوەى دیاربێت ئێمە چەند کاتژمێر کارەبا بدەینە هاونیشتمانییان.
- لیترێک گاز بە هەزارو 400 دینارە لە بازاڕى ڕەشدا.
- ئێمە ناتوانین 530 مۆلیدە کار پێبکەین بەبێ هیچ بەرنامەو وادەیەکى دیاریکراو.
- 20 ڕۆژ کار بە مۆلیدە بکە هەر ئەوەندە کارەباى 24 کاتژمێریى دێتەوە، هاونیشتمانییان پارەى 20 ڕۆژەکە نادەن.
- قایمقامیێت پێیخۆش بوو کارەباى سلێمانى بەرنامەیەکی بۆ کارپێکردنى مۆلیدەکان هەبێت.
لە شەوى یەکشەممە لەسەر دووشەممە هێرش کرایە سەر کێڵگەى کۆرمۆر، بەو هۆیەوە بەرهەمهێنانى غاز ڕاگیرا، کە سەرچاوەى بەرهەمهێنانى کارەبایە و ئەوەش وایکرد زۆرینەى هاونیشتمانییان بێ کارەبا بن.
