میدیای تورکیا وردەکاریی چۆنیەتی ڕادەستکردنی چەکەکانی پەکەکە بڵاودەکاتەوە
بە گوێرەی ڕاپۆرتی ڕۆژنامەی تورکیا کە لە دەسەڵاتەوە نزیکە، پاش دەرچوونی یاسای تایبەت بە پڕۆسەکە لە پەرلەمانی تورکیا، ماوەی مانگ و نیوێک تاوەکو دوو مانگ لە بەردەم پەکەکەدایە بۆ ئەوەی چەکەکانی ڕادەست بکات. پێش ئەوە، عەبدوڵا ئۆجەلان بانگەوازی چەکڕادەستکردن دەکات و دوای ئەوەش پەکەکە وردەکاری چۆڵکردنی بنکە و بارەگاکانی ئاشکرا دەکات.
پابەندبوون بە وادەى دیاریکراو
- ئەگەر تاوەکو کۆتایی ئەیلول چەکڕادەستکردن کۆتایی بێت و ئەنجوومەنی ئاسایشی نەتەوەیی تورکیا، کۆتاییهاتن و چەکڕادەستکردنی پەکەکە پشتڕاستبکاتەوە، لە مانگی تشرینی یەکەمی ئەمساڵەوە، دەست بە جێبەجێکردنی یاساکە دەکرێت.
- سەرچاوە ئەمنییەکان ئاماژەیان بەوە کردووە، ئەو کەسانەی یاساکە دەیانگرێتەوە، لە نوێنەرایەتییەکانی تورکیا لە سلێمانی و هەولێر ناوی خۆیان تۆمار دەکەن و لەو خاڵانەشی لەو دوو پارێزگایە دادەنرێن، چەکەکانیان ڕادەست دەکەن.
- جگە لە چەکەکانی دەستیان، ئەندامانی پەکەکە درۆن و هەموو ئەو ئامێر و چەکانەی دیکە ڕادەست دەکەن کە لایانە و بۆ وەرگرتنیشیان، میت میکانیزمی خۆی دەگرێتەبەر.
- ئەوانەشی لە وڵاتانی دیکەن، لە نوێنەرایەتییەکانی تورکیا ناوی خۆیان تۆمار دەکەن، ئەو ناوانە بە هەماهەنگیی نێوان میت و وەزارەتەکانی دەرەوە، بەرگری، لێکۆڵینەوەیان لەبارەوە دەکرێت و بەگوێرەی کەسەکان دۆسیەکەیان یەکلایی دەکرێتەوە.
- ئەو ئەندامانەی پەکەکە دەگەڕێنەوە و سزاکانیان هەڵدەپەسێردرێت، پێویست ناکات ڕۆژانە و هەفتانە واژۆ بکەن و چوونە دەرەوەشیان لە وڵات لێقەدەغە ناکرێت.
- 180 بۆ 200 کادری باڵای پەکەکە و نزیکەی هەزار ئەندامی دیکەی پەکەکە، یاساکە نایانگرێتەوە و ناتوانن بگەڕێنەوە بۆ باکووری کوردستان و تورکیا، لەوانەش؛ باهۆز ئەرداڵ، موراد قەرەیلان، جەمیل بایک، دوران کاڵکان و بەسێ هۆزات.
- عەبدوڵا ئۆجەلان کە لە 1999ـوە لە زیندانی دوورگەی ئیمراڵییە، سوود لە یاساکە وەرناگرێت.
ئەوانەى لە زیندانەکاندان
ئەو کەسانەشی لەسەر دۆسیەی پەکەکە و کەجەکە لە زیندانەکاندان، بە چوار هەزار و 500 تاوەکو پێنج هەزار کەس مەزەندە دەکرێن. ئەوانەی تاوانی کوشتنیان لەسەرە لە دەرەوەی یاساکە دەبن و ئەوانی دیکە بە گوێرەی ئەو سزایەی بەسەریاندا سەپێنراوە، سزاکەیان هەڵدەسەپێردرێت و ئازاد دەکرێن.
ڕۆژنامەی نەفەسیش بڵاویکردووەتەوە، زیاتر لە800 ئەندامی پەکەکە کە پێش2005 بە سزای قورس خراونەتە زیندان، سوود لە یاساکە نابینن.
