وەزارەتى ناوخۆى هەرێمى کوردستان لێکتێگەیشتنەکانى شنگال ڕەتدەکاتەوە

وەزارەتی ناوخۆی حکومەتی هەرێمی کوردستان ڕایگەیاند، بە نیگەرانییەوە چاودێریی ئەو لێکتێگەیشتنانە دەکات کە حکومەتی فیدراڵ سەبارەت بە دۆخی شنگال ئەنجامیداون و دەڵێت” بەشێوەیەکی تاکلایەنە و بەبێ ڕاوێژ لەگەڵ هەرێمی کوردستان کراون”.

وەزارەتى ناوخۆ:

• هەر هەنگاوێکی لەم شێوەیە، پێچەوانەی ڕێککەوتننامەی شنگالە کە لە تشرینی یەکەمی 2020 بە سەرپەرشتیی نەتەوە یەکگرتووەکان واژۆ کراوە.
• بە بیر هەموو لایەکیش دێننەوە کە شنگال و چیای شنگال بە خوێنی ئاڵی 500 شەهید و 3000 برینداری پێشمەرگە ئازاد کراوە.
• دەبێت ڕێز لەو قوربانی و تێکۆشانە بگیرێت.
• سەپاندنی واقیعێکی ئەمنی و کارگێڕیی نەخوازراو لە دەرەوەی دامەزراوە شەرعییەکان، دۆخی دەڤەرەکە ئاڵۆزتر دەکات و پرۆسەی ئاساییکردنەوە لەباردەبات.
• تاکە ڕێگەچارەی دروست، جێبەجێکردنی تەواوی ڕێککەوتننامەی شنگالە.
• داوا لە حکومەتى فیدراڵ دەکەین، پابەندی ڕێککەوتننامەی شنگال و سەرجەم ڕێککەوتنە سیاسی و بەرنامەی حکومەتە یەک لە دوای یەکەکانی فیدرال بێت کە لە بوارەکانی ئیداری، ئەمنی و ئاوەدانکردنەوەدا کراون.
• ئەگەر جێبەجێکردنی ئەم ڕێککەوتنانە ئەستەمە، با بگەڕێنەوە بۆ ڕا و ئیرادەی خەڵکی شنگال بەتایبەتی ئێزدییەکان.
• کێیان پێ باشە و چییان پێ باشە با بڕیاری لەسەر بدەن و هەمووان پابەند و پشتیوان بن بۆ هەڵبژاردەکەیان.

ڕاگەیێنراوەکەى وەزارەتى ناوخۆ هاوکاتە لەگەڵ پرۆسەى تێکەڵکردنى یەکینەکانى بەرخۆدانی شنگال بە دامەزراوە ئەمنییەکانى حکومەتى عێراق.