نوێترین ئاماری زیانەكانی لافاوەكەی هەولێر
شەوی رابردوو لەچەند گەڕەكێكی هەولێر لافاو دروستبوو، بەهۆیەوە دوو هاووڵاتی گیانیان لەدەستداو زیان بەر سەدان ئۆتۆمبێل و چەند گەڕەك و بازاڕێكی شارەكە كەوت، هاوكات پارێزگاری سلێمانی و سەرۆكی كۆمسیۆنی فریاگوزاریی چەمچەماڵ ئامادەییان بۆ هەموو هاوكارییەكی هەولێر دەبڕی.
شەوی 7ی 11ی 2026، لە گەڕەكەكانی هەولێری نوێ و شێخ ئەحمەد و چەند گەڕەك و شەقامێكی دیكەی هەولێر لافاو دروستبوو، بەهۆیەوە گەنجێكی 25 ساڵان بەناوی محەمەد رەسوڵ و منداڵێكی 5 ساڵان بەناوی مستەفا سەركەوت، لە دوو ناوچەی جیای شارەكە گیانیان لەدەستدا.
هەرچەندە تاوەكو ئێستا زیانە مادییەكان نەخەمڵێندراون، بەڵام هەر بەهۆی لافاوەكەوە، سەدان خانوو، دوكان، ئۆتۆمبێل و شوێنی بازرگانیی زیانیان بەركەوت.
هاوكات هەریەك لە د.هەڤاڵ ئەبوبەكر، پارێزگاری سلێمانی و عەتا محەمەد، سەرۆكی كۆمیسیۆنی فریاگوزاریی چەمچەماڵ، ئامادەیی و پشتیوانیی تەواوی خەڵك و حكومەتی خۆجێی سلێمانیان بۆ هەر ئەرك و هەرەوەزیی و هەماهەنگیی و هاوكارییەكی پارێزگای هەولێر دووپاتكردەوەو رایانگەیاند: ئامادەین بۆ بەهاناوەچوونی خوشك و براكانمان لە هەولێر.
