لە 10 ساڵی داهاتوودا عێراق ساڵانە 300 ڕۆژ ڕووبەڕووی خۆڵبارین دەبێتەوە
ڕوانگەی عێراقی سەوز هۆشدارییەکی توندی لەبارەی مەترسییەکانی گۆڕانی کەشوهەوا بڵاوکردەوە و ئاشکرای دەکات، بەهۆی خێرابوونی پرۆسەی بیابانبوونەوە، پێشبینی دەکرێت لە ماوەی 10 ساڵی داهاتوودا عێراق ساڵانە ڕووبەڕووی 300 ڕۆژ خۆڵبارین ببێتەوە.
چیرۆکی سەرەکی: بەپێی ڕاپۆرتە نێودەوڵەتییەکان، عێراق یەکێکە لە پێنج وڵاتە هەرە زیانلێکەوتووەکانی جیهان لەژێر کاریگەرییەکانی گۆڕانی کەشوهەوادا. کەمبوونەوەی بەرچاوی ئاوی ڕووبارەکانی دیجلە و فورات، بەرزبوونەوەی پلەکانی گەرما و لەناوچوونی ڕووبەری سەوزایی، وایکردووە دیاردەی بیابانبوون بە خێرایی لە ناوەڕاست و باشووری عێراقدا پەرە بستێنێت و مەترسییەکی گەورە لەسەر ژینگەی وڵاتەکە دروست بکات.
ڕاگەیێنراوی فەرمی: ڕوانگەی عێراقی سەوز کە ڕێکخراوێکی ژینگەیییە، لە نوێترین ڕاپۆرتیدا ڕایگەیاندووە: لە نێوان ساڵانی 1951 بۆ 1990 بەرزترین ئاستی خۆڵبارین لە عێراقدا تەنیا 24 شەپۆل بووە لە ساڵێکدا، بەڵام پێشبینی دەکرێت لە ماوەی 10 ساڵی داهاتوودا بەهۆی وشکەساڵی و گۆڕانی کەشوهەواوە، ژمارەی ڕۆژەکانی خۆڵبارین بگاتە 300 ڕۆژ لە ساڵێکدا.
زانیاریی زیاتر: ڕوانگەکە ئاماژەی بەوەش کردووە، شەش ناوچەی سەرەکی وەک سەنتەری دروستبوونی خۆڵبارین دەستنیشان کراون کە دەکەونە ناوەڕاست، ڕۆژئاوا و بەتایبەت پارێزگاکانی باشووری عێراق. لێکۆڵینەوە نێودەوڵەتییەکانیش دەریان خستووە کە ئەم ناوچانە بەهۆی بەبیابانبوونی زۆربەی زەوییەکانیانەوە دروست بوون و بوونەتە سەرچاوەی هەڵکردنی شەپۆلەکانی خۆڵبارینی بەردەوام.
ئەوەی پێویستە بیزانیت: کاریگەریی ئەم شەپۆلە خۆڵبارینەی عێراق سنوورەکانی بڕیوە و گەیشتووەتە وڵاتانی دراوسێی وەک کوەیت، سعوودیە، قەتەر، ئیمارات و تورکیا. هاوکات لە وەرزی هاویندا تێکڕای پلەکانی گەرما لە بەغدا دەگاتە 50 پلەی سیلیزی و لە ناوچەی ڕوتبەش 45 پلە تۆمار دەکرێت، ئەمەش لە کاتێکدایە کە تەنیا ناوچە شاخاوییەکانی باکوور و باکووری ڕۆژهەڵات تا ڕادەیەک لە مەترسیی ئەم وشکەساڵییە توندە پارێزراون.
