قوباد تاڵەبانی: چین بەشدارییەکی کاریگەرتری هەبێت لە گەشەپێدانی کوردستان
قوباد تاڵەبانی جێگری سەرۆکوەزیرانی هەرێمی کوردستان، لەگەڵ لیۆ جون، کونسوڵی گشتیی چین کۆبووەوە و تێیدا تاوتوێی برەودان بە پەیوەندییەکان و پرۆسەی گەشەپێدانی هەرێمی کوردستان کرا و هیوای خواست چین بەشدارییەکی کاریگەرتری دەبێت لە گەشەپێدانی ئابووریی کوردستاندا.
لە کۆبوونەوەکەدا کە رۆژی 1ی9ی2026،بەڕێوەچوو، باس لە گەشەپێدانی ئابوری و گرنگیی پاراستنی ئاسایش و سەقامگیریی هەرێم کرا، لەمبارەیەوە کونسوڵی گشتیی چین ئاماژەی بەوەدا سەقامگیری هەرێم و گەشەپێدانی ئابووریی کوردستان بۆ چین گرنگە و وڵاتەکەی ئامادەیە لەهەر دوو بوارەکەدا هاوکاری هەرێمی کوردستان بکات.
لە بەشێکی دیکەی کۆبوونەوەکەدا باس لە گرنگیی پەرەپێدانی پەیوەندییەکان لەبوارەکانی زانستی و کلتووری کرا. لەم چوارچێوەیەشدا کونسوڵی گشتیی چین ئامادەیی وڵاتەکەی دەربڕی ئاسانکاری زیاتر بکات بۆ وەرگرتنی خوێندکارانی هەرێم لە زانکۆکانی ئەو وڵاتەدا.
