20ی ئەیلول یان دواتر دەوامی خوێندنگاکان لە هەرێم دەستپێدەکات
ساتی دەستپێکردنی یەکەم رۆژی خوێندن لە قوتابخانەی مەڵکەندی لە سلێمانی بۆ ساڵی خوێندنی 2025 – 2026.
پووختەی هەواڵەکە:
- وەزارەتی پەروەردە دوای 15ی ئەیلول بڕیاری کۆتایی لەسەر ڕۆژی دەستپێکی خوێندن دەدات.
- پێشبینی دەکرێت پڕۆسەی خوێندن لە 20ی ئەیلول یان دواتر بەهۆی فێنکبوونی کەشوهەوا دەستپێبکات.
- وەزارەت لە ئێستادا سەرقاڵی ڕێکخستنەوەی میلاکاتە و هیچ گرفتێکی کەمیی مامۆستای نییە.
وەزارەتی پەروەردەی هەرێم بڕیاریداوە دەستپێکی ساڵی نوێی خوێندن تا فێنکبوونی کەشوهەوا دوابخات. بڕیارە لە ناوەڕاستی مانگی داهاتوودا لە کۆبوونەوەیەکی فراواندا لەگەڵ سەرجەم بەڕێوەبەرە گشتییەکان، ڕۆژی یەکەمی چوونە ناو پۆلەکان بۆ ساڵی خوێندنی 2026 بۆ 2027 بە فەرمی دیاری بکرێت.
وەزارەتی پەروەردە و ئامادەکارییەکان:
- سەیوان عەلی، بریکاری وەزیری پەروەردە، ڕایگەیاندووە کە بڕیاری کۆتایی لە دوای 15ی ئەیلول دەدرێت.
- وەزارەت چاوەڕێی فێنکبوونی کەشوهەوا دەکات بۆ ئەوەی ژینگەیەکی گونجاو بۆ قوتابیان دابین بکات.
- لە ئێستادا کار بۆ ڕێکخستنەوەی میلاکاتی مامۆستایان لە هەموو پارێزگا و ئیدارە سەربەخۆکان دەکرێت.
- بەرپرسانی پەروەردە دووپاتی دەکەنەوە کە هیچ گرفتێکی میلاک لە ناوەندەکانی خوێندندا بوونی نییە.
