لیستی ناوی زەوی لە سلێمانی ڕاگەیەندرا
شارەوانیی سەیدسادق ناوی ٢ هەزار فەرمانبەر و خانەنشینی تری بۆ وەرگرتنی زەوی بڵاوکردەوە
سەرۆکایەتیی شارەوانیی سەیدسادق قۆناغی سێیەمی ناوی ئەو فەرمانبەر و خانەنشینانەی ڕاگەیاند کە مامەڵەی وەرگرتنی زەوییان گەڕاوەتەوە. لەم قۆناغەدا ناوی ٢ هەزار کەس بەپێی خاڵبەندی (لە بەرزترینەوە بۆ نزمترین) ڕیزبەند کراوە، بەمەش بە کۆی گشتیی هەر سێ قۆناغەکە تاوەکو ئێستا ناوی ٤ هەزار کەس بڵاوکراوەتەوە.
شارەوانیی سەیدسادق چەند ڕوونکردنەوە و ڕێنماییەکی گرنگی بۆ بەشداربووان بڵاوکردووەتەوە:
سەرجەم ناوەکان بە شێوەی لیست لە ڕێگەی پەیجی فەرمیی سەرۆکایەتیی شارەوانیی سەیدسادق و بەڕێوەبەرایەتیی گشتیی شارەوانییەکانی سلێمانی بڵاودەکرێنەوە.
زیاتر لە ٥ هەزار ناو گەڕاوەتەوە بۆ شارەوانی و لە ماوەی هەفتەیەکدا، ڕۆژێک دوای بڵاوکردنەوەیان لە پەیجی فەرمی، لە بینای شارەوانی هەڵدەواسرێن.
هەر فەرمانبەر یان خانەنشینێک زانیی گرفتی لە ژمارەی خاڵەکانیدا هەیە، دەتوانێت بۆ وردبینیکردن سەردانی بەشی (زەویوزار و موڵکەکان) لە شارەوانیی سەیدسادق بکات.
شارەوانی جەخت دەکاتەوە کە لە هەوڵەکانی بەردەوامە بۆ دابینکردنی زەوی بۆ تەواوی ئەو فەرمانبەر و خانەنشینانەی کە لەم قۆناغەدا چانسی وەرگرتنی زەوییان نەبووە.
