دەستەی دەستپاکی لێکۆڵینەوە لە بەقاچاخبردنی بەنزینی کەرکووک دەکات
- زانیاری لەسەر بەقاچاخبردنی بەنزینی پاڵپشتیکراوی کەرکووک دراوەتە دەستەی دەستپاکی عێراق.
- بەشێک لە بەنزینی وێستگە حکومییەکان بە قاچاخ دەبرێتە هەرێمی کوردستان و بە گرانتر دەفرۆشرێت.
- دۆسیەی ئەمنی وێستگەکانی کەرکووک بۆ ڕێگری لە قاچاخچێتی ڕادەستی پۆلیسی وزە و سوپا کراوە.
- لیژنەکانی پشکنین دەستیان بە جەردکردنی کۆبوونەکان و وردبینیکردنی دابەشکردنی بەنزین کردووە.
زانیارییەک گەیشتووەتە کەناڵ8 کە نیشانی دەدات ناوی چەند کەسێک و بەڵگەی پێویست دراوەتە نووسینگەی دەستەی دەستپاکیی عێراق لەبارەی بەقاچاخبردنی سووتەمەنی. ئەم دۆسیەیە پەیوەندی بەو بەنزینەوە هەیە کە حکومەت بە نرخێکی هەرزان بۆ شۆفێرانی کەرکووک دابینی دەکات، بەڵام بە شێوەی نایاسایی دەبرێتە دەرەوەی پارێزگاکە. چاوەڕوان دەکرێت لە چەند کاتژمێری داهاتوودا هەڵمەتێکی فراوان بۆ دەستگیرکردنی تۆمەتباران لە ناو وێستگە حکومییەکاندا دەستپێبکات.
بەگوێرەی زانیارییەکانی کەناڵ8 لە کەرکووک زانیاریی دراوەتە دەستەی دەستپاکی:
- زانیاری و بەڵگەکان ڕەوانەی نووسینگەی کەرکووکی دەستەی دەستپاکی کراون بۆ دەستپێکردنی لێکۆڵینەوەی یاسایی.
- لیژنەکانی پشکنینی کۆمپانیای دابەشکردنی بەرهەمە نەوتییەکان سەردانی مەیدانییان بۆ وێستگەکان دەستپێکردووە.
- پڕۆسەی جەردکردنی کۆبوونەکانی بەنزین لە سەرجەم وێستگەکان بۆ دۆزینەوەی سەرپێچییەکان بەڕێوەدەچێت.
- ئامانجی ئەم هەنگاوانە ڕێگریکردنە لەوەی بەنزینی حکومی بە نرخێکی گرانتر لە هەرێمی کوردستان بفرۆشرێتەوە.
ڕێکارە ئەمنییەکان لە وێستگەکان:
بۆ کۆنترۆڵکردنی بارودۆخەکە، دۆسیەی ئەمنی وێستگە حکومییەکان ڕادەستی پۆلیسی وزە و هێزەکانی سوپای عێراق کراوە. ئەم هێزانە ئەرکی پاراستنی وێستگەکانیان پێسپێردراوە تاوەکو ڕێگری لە هەر هەوڵێکی گواستنەوەی نایاسایی سووتەمەنی بکەن. لیژنەکانی بەشی پشکنینیش بە شێوەیەکی بەردەوام چاودێری پڕۆسەی دابەشکردنەکە دەکەن بۆ ئەوەی دڵنیابنەوە لەوەی سووتەمەنییەکە ناچێتە دەرەوەی پارێزگاکە.
ئاماری وێستگەکان و پشکی بەنزین:
پارێزگای کەرکووک خاوەنی 22 وێستگەی حکومیی دابەشکردنی سووتەمەنییە کە بەنزین بە نرخی پاڵپشتیکراو و لە ڕێگەی کۆبۆنەوە دەدەنە شۆفێران. پشکی ڕۆژانەی پارێزگاکە لەم جۆرە بەنزینە ملیۆنێک و 920 هەزار لیترە، کە بەهۆی جیاوازیی نرخەکەی لەگەڵ بازاڕەکانی هەرێمی کوردستان، زۆرجار دەبێتە ئامانجی بەقاچاخبردن
