وتاری ئەم هەینییە بۆ مامۆستایانی ئایینی دیاریكر
بۆردی باڵای وتاری هەینی لە وەزارەتی ئەوقاف لە پەیامێکدا داوا لە مامۆستایانی ئایینی دەکەن، لە وتاری دووەمی ئەم هەینییە ئیدانەی وتاری توند و رقەبەرایەتی بکەن و جەخت بکەنەوە لە قووڵکردنەوەی گیانی برایەتیی نێوان نەتەوەکان و رێزگرتن لە بیر و بۆچوونە جیاوازەکان لە چوارچێوەی ئیسلامدا.
ئەم پایەمە دوای ئەوە هات، کە وتاربێژێکی ئایینی لە رۆژهەڵاتی کوردستان لە گرتە ڤیدیۆیەکدا قسەی نەشیاو و هەڕەشەی بەرامبەر بە ئێزیدییەکان کرد.
بۆردی باڵای وتاری هەینی دەشڵێن: لە ڤیدیۆکەدا بەناوی ئایینی ئیسلام و پێغەمبەرەوە، هەڕەشە لە برا ئێزدییەکان دەکرێت و ئێمە ئەو وتارە ئیدانە دەکەین و جگە لەوەش هەموو وتارێکی زبر و رقەبەری ئیدانە دەکەین، کە دژ بێ بە پەیامی ئیسلام و دۆخی ئارامیی کوردستان و پێکەوەژیانی نێوان پێکهاتەکان.
لە پەیامەکەدا هاتووە: ئیسلام پەیامی رەحمەت و میهرەبانی و برایەتیی نێوان گەلان و ئایین و نەتەوەکانە، ئەو جۆرە کەسانە گوزارشت لە رای گشتیی وتاربێژان ناکەن و پێچەوانەی رێڕەوی کاری پیرۆزی مامۆستایانی ئایینییە.
