مەزڵوم عەبدى بەجیا لەگەڵ وەزیرى پەروەردە و وەزیرى خوێندنى باڵای سووریا کۆبووەوە
کۆبوونەوەی مەزڵوم عەبدی و وەزیرانی پەروەردە و خوێندنی باڵای سووریا
پووختەی هەواڵەکە
- لە کۆبوونەوەکاندا باس لە دابینکردنى پێداویستییەکانى خوێندنى کوردى کراوە.
- یەکگرتنى زانکۆکانى ڕۆژئاوای کوردستان و زانکۆکانى دیکەى سووریا تاوتوێکراوە.
- مەزڵوم عەبدى و وەزیری خوێندنی باڵا باسیان لە کردنەوەی زانکۆی نوێ کردووە.
بەگوێرەى ڕاگەیێنراوێکى وەزارەتى پەروەردەى سووریا، محەممەد عەبدولڕەحمان وەزیرى پەروەردەى سووریا لەگەڵ مەزڵوم عەبدى ڕاوێژکارى سەرۆکایەتیى کۆمارى سووریا کۆبووەتەوە و لە کۆبوونەوەکە گفتوگۆکراوە لەسەر جێبەجێکردنى مەرسوومى ژمارە 13ى ساڵى 2026 ی سەرۆکایەتیى سووریا و ڕێنماییەکانى جێبەجێکردنى مەرسوومەکە.
خوێندنی کوردی لە سووریا
- لەکۆبوونەوەکە گفتوگۆکراوە لەسەر دابینکردنى پەرتوکى زمانى کوردى و دابینکردنى مامۆستای تایبەت و تەواوکردنى ڕێکارەکانى تێکەڵکردنى دۆسییەى پەروەردە و فێرکردن.
- لە کۆبوونەوەى عەبدى و مەڕوان حەلەبى وەزیرى خوێندنى باڵا باسیان لە جێبەجێکردنى یەکگرتنى زانکۆکانى باکوور و ڕۆژهەڵاتى سووریا لەگەڵ زانکۆکانى دیکە کردووە.
- باس لە دان نان بەبڕوانامەکانی پێشووتر کراوە، لەگەڵ بنیاتنانى زانکۆى نوێ لە حەسەکە و ڕەققە.
خوێندنی کوردی بەرهەمی خەباتی ڕۆژئاوای کوردستان
لە سووریا بۆ یەکەمجار بەفەرمى دەوڵەت دانى بەزمانى کوردى ناوە و بڕیاریداوە بە دابینکردنى پێداویستییەکانى خوێندنى کوردى.
ئیلهام ئەحمەد، سیاسەتمەدارى ڕۆژئاواى کوردستان بەر لە دوو ڕۆژ ڕایگەیاند، لە کۆبوونەوەکانیان لەگەڵ بەرپرسانى دیمەشق زۆرترین گفتوگۆیان لەسەر مژارى خوێندن بە زمانى کوردى کردووە و ئەو دانپێدانانە فەرمیەى دەوڵەتى بە سەرەکیترین بەرهەمى شۆڕشەکەیان ناوزەند کرد.
ئەوە لە کاتێکدایە، خۆپیشاندانی خوێندکاران لە شار و شارۆچکەکانی ڕۆژئاوای کوردستان بۆ داواکردنی خوێندن بە زمانی دایک بەردەوامە و بڕیاری حکومەتی کاتی سووریا ڕەتدەکەنەوە بە خوێندنی سێ وانەی کوردی لە هەفتەیەکدا ، جەختدەکەنەوە، کە چەندین ساڵە خوێندنیان بە کوردی بووە و داوا دەکەن خوێندن لە ڕۆژئاوای کوردستان هەر بە کوردی بمێنێتەوە.
