دەریاچەی وان ڕووبەڕووی مەترسیی وشکبوون بووەتەوە
گۆڕانی کەشوهەوا و سیاسەتە نادروستەکانی دەسەڵاتەوە، دەریاچەی وان بەرەو چارەنووسی دەریاچەکانی ورمێ و ئارال هەنگاو دەنێت.
گویلجان کاچماز سایغیت، پەرلەمانتاری پارتی یەکسانی و دیموکراسی گەلان (دەم پارتی) لە پەرلەمانی تورکیا، هۆشداریی دەدات کە دەریاچەی وان لە باکووری کوردستان بەهۆی گۆڕانی کەشوهەوا و سیاسەتە نادروستەکانی دەسەڵاتەوە ڕووبەڕووی مەترسیی لەنێوچوونی ڕاستەقینە بووەتەوە و داوای کرد بە یاسایەکی تایبەت بپارێزرێت.
بەپێی وتەکانی سایغیت، ئاستی ئاوی دەریاچەکە بە شێوەیەکی بەردەوام لە دابەزیندایە، بە جۆرێک لە هەندێک شوێندا کەمبوونەوەی ئاوەکە گەیشتووەتە نزیکەی ٢٠٠ مەتر و جەختیکردەوە کە پڕۆژەکانی وەک دروستکردنی بەنداو و ناوەندەکانی بەرهەمهێنانی وزە، سەرچاوەکانی وانیان بڕیوە، ئەمەش وایکردووە دەریاچەی وان هاوشێوەی دەریاچەی ئارال لە کازاخستان و دەریاچەی ورمێ لە ڕۆژهەڵاتی کوردستان، بکەوێتە ژێر مەترسیی جدیی وشکبوونەوە.
دەریاچەی وان کە دەکەوێتە نێوان پارێزگاکانی بەدلیس و وان لە باکووری کوردستان، گەورەترین دەریاچەی جیهانە. دەریاچەکە خاوەنی ڕووبەری ٣ هەزار و ٧١٣ کیلۆمەتر دووجایە و قووڵییەکەی دەگاتە ٤٥١ مەتر. دەم پارتی پاراستنی ئەم سامانە سروشتییە بە ئەرکێکی نیشتمانی و بنەمایەک بۆ پاراستنی هاوسەنگیی ژینگەیی و ئابووریی ناوچەکە دەزانێت و هەر لەبەر ئەمەش پرسەکەی گەیاندووەتە ناو پەرلەمانی تورکیا تا حکومەت ناچار بە ڕاگرتنی ئەو پڕۆژانە بکات کە زیان بە دەریاچەکە دەگەیەنن.
