ئەوقافی سلێـمانی: قورئانخوێنی پرسە نابێت لە 50 بۆ 70 هەزار دینار زیاتر وەربگرێت
بەڕێوەبەرایەتیی ئەوقافی سلێمانی نووسراوێکی ئاڕاستەی سەرجەم پێشنوێژ و وتار خوێنەکان کردووە، لە بارەی بەڕێوەبردنی پرسەوە چەند ڕێنماییەکی نوێی دەرکردووە کە بریتین لە:
1- مامۆستا و خزمەتگوزاری مزگەوت دەستوەردان نەکەن لە بابەتی بە کرێدانی خێمە و کورسی و قورئانخوێن بۆ پڕسه.
2- هیچ بڕەپارەیەک داوانەکرێت لە بەرامبەر بەکرێدانی هۆڵی پرسە یان هەر بابەتێکی تر.
3-قورئانخوێن پابەند بێت بەو نرخەی بۆی دیاریکراوە لەلایەن وەزارەتی ئەوقافەوە کە 50 بۆ 70 هەزار دینارە.
4- رێگە نەدرێت بە گێڕانی و دانانی چا و قاوە لە پرسەکاندا، چونکە هەم دەبێتە بارگرانی بۆ سەر شانی هاوڵاتییان و هەمیش دەبێتە هۆی هۆی پیسکردن و ناشرینکردنی سیمای مزگەوت و بەجێهێشتنی پاشماوە و خاشاک، کە پێچەوانەی ڕێنماییەکانی ئایینی پیرۆزی ئیسلامە.
5-دەکرێت لەکاتی پڕسهدا و بە مەبەستی ئاسانکاری سوود لە ئامێری ئەلیکترۆنی وەربگیرێت بۆ قورئان خوێندن.
6- کاتی پرسە لە کاتژمێر 1:00 پاشنیوەڕۆوە دەستپێدەکات و دوای ئەنجامدانی نوێژی عەسر پڕسه کۆتایی دێت، جگە لەکاتی پرسە نابێت هیچ کاتێکی دیکە بەیانیان یان شەوان هۆڵی پرسە کراوە بێت، چونکە دەبێتە هۆی بێزاری بۆ دراوسێکانی مزگەوت.
