شەقامی کۆمەڵگای ئیبراهیم خەلیل بە ستانداردێکی نێودەوڵەتی دروست دەکرێت
سەرپەرشتیاری ئیدارەی سەربەخۆی زاخۆ ڕایگەیاند، کە شەقامی کۆمەڵگای ئیبراهیم خەلیل بە ستانداردێکی نێودەوڵەتی و بە شەش ئۆڤەرپاس و ئەندەرپاسەوە دروست دەکرێتەوە.
گوهدار شێخۆ، سەرپەرشتیاری ئیدارەی سەربەخۆی زاخۆ ڕایگەیاند، کە دیزاینی شەقامی نێودەوڵەتیی کۆمەڵگای ئیبراهیم خەلیل و شەقامە خزمەتگوزارییەکەی تەواو بووە، کە بە ستانداردێکی نێودەوڵەتی و ڕێکوپێک دروست دەکرێت، پرۆژەکە لە شەش ئۆڤەرپاس و ئەندەرپاس پێكدێت و لە دەروازەی نێودەوڵەتیی ئیبراهیم خەلیلەوە تاوەکو ئۆڤەرپاسی زاخۆ درێژ دەبێتەوە.
ئاماژەی بەوەشکرد، سەبارەت بەو کۆمەڵگایەی نیشتەجێبوون بە ناوی ئیبراهیم خەلیل، لە پلاندایە دانیشتووانەکەی قەرەبوو بكرێنەوە و ناوچەکە بكرێتە محەرەماتی کۆمەڵگای ئیبراهیم خەلیل.
ئەم شەقامە نێودەوڵەتییە ڕۆڵێکی ستراتیژی دەگێڕێت لە گرێدانەوەی هەرێمی کوردستان و عێراق بە کۆماری تورکیاوە وەک سەرەکیترین دەروازەی بازرگانی و هاتوچۆی هاووڵاتییان، هەر بۆیە گەشەپێدانی ئەم میحوەرە بەپێی ستانداردە نێودەوڵەتییەکان ئاسانکاریی گەورە بۆ جووڵەی ترانزێت و بازرگانیی نێوان هەردوو وڵات دەکات.
ئەم هەنگاوە لە کاتێکدایە کە لە ساڵی ٢٠٢١دا ڕێگای نێودەوڵەتیی ئیبراھیم خەلیل – زاخۆ بە گوژمەی ٧ ملیار و ٨٤٠ ملیۆن دیناری عێراقی نۆژەن و فراوان کرابووەوە كه درێژییهكهی نزیكهی هەشت كیلۆمەتر دهبێت.
نۆژەنکردنەوە و گەشەپێدانی بەردەوامی ڕێگای ئیبراھیم خەلیل سوودێکی زۆری بۆ خەڵکی ناوچەکە و ئاسانکاریی جووڵەی بازرگانی لەگەڵ تورکیا هەیە، چونکە ڕێگایەکی سەرەکیی نێودەوڵەتییە و ڕۆژانە قەڵەباڵغییەکی زۆری لەسەرە، هەر بۆیە حکوومەتی هەرێمی کوردستان بڕیاری نۆژەنکردنەوە و تەرخانکردنی بوودجەی پێویستی بۆ دەرکردووە.
