عێراق کورتهێنانی دەبێت؛ ٣٦ تریلیۆن دینار زیان و بەغداش پشکی کوردستان ئاشکرا دەکات

وەزارەتى دارایی عێراق، خشتەى داهات و خەرجییەکانى نۆ مانگى ئەمساڵى بڵاوکردووەتەوە و تیایدا ئەوە خراوەتەڕوو، داهاتى فرۆشتنى نەوت، 40 تریلیۆن و 201 ملیار دینار بووە و 76%ـى کۆى داهاتى عێراقى پێکهێناوە، هاوکات داهاتى نانەوتى 12 تریلیۆن و 620 ملیار دینار بووە و 24%ـی کۆى داهاتى پێکهێناوە.

خشتەکانی وەزارتی دارایی چی دەڵێن؟

• کۆى گشتیی خەرجیی عێراق، 89 تریلیۆن و 80 ملیار دینار بووە.
• لەو بڕەش 85 تریلیۆن و 679 ملیار دینارى بۆ خەرجیی بەکاربردن و تەنیا سێ تریلیۆن و 401 ملیار دینارى بۆ وەبەرهێنان بووە.
• واتە نزیکەى 3.9%ـى بۆ خەرجیی وەبەرهێنان بووە و 96.1% بۆ بەکاربردن بووە.
• بە دەرکردنى خەرجییەکانى عێراق لە کۆى گشتیى داهاتى عێراق، دەردەکەوێت عێراق لە نۆ مانگى ساڵى 2026ـدا کورتهێنانێکى زۆرى هەیە.
• کورتهێنانەکەى دەگاتە 36 تریلیۆن و 259 ملیار دینار، واتە تێکڕاى مانگانە چوار تریلیۆن و 28 ملیار دینار دەکات.
• بەگوێرەى داتاى وەزارەتەکە، وەزارەتى دارایی عێراق، زۆرترین خەرجیی هەبووە و گەیشتووەتە 22 تریلیۆن و 274 ملیار دینار، وەزارەتى ناوخۆ نۆ تریلیۆن و 966 ملیار دینار خەرجیی هەبووە.
• وەزارەتى پەروەردەى عێراقیش هەشت تریلیۆن و 297 ملیار دینار خەرجیى هەبووە و لە نۆ مانگى ئەمساڵدا.
• نۆ تریلیۆن و 430 ملیار دینارى بۆ هەرێمى کوردستان ناردووە.
• هەولێریش بڕى 993 ملیار و 386 ملیۆن دینارى وەک داهاتى نانەوتیی ڕادەستى بەغداد کردووە، یاخود مەقاسە کراوە لە مووچە، وەک پشکى داهاتى نانەوتیی فیدڕاڵى.
• بە گوێرەى داتا فەرمییەکانى وەزارەتى دارایی عێراق، سەرۆکایەتى ئەنجوومەنى وەزیران شەش تریلیۆن و 148 ملیار دینار و ئەنجوومەنى نوێنەران 438 ملیار و سەرۆکایەتى کۆمار 35 ملیار دیناریان خەرج کردووە.