بنەماڵەی مەلا شڤان: دەبوایە مردنی هەڵبژاردایە نەوەک تەسلیمی پارتی ببێت

پووختەى هەواڵ

• چوونى بەشێک لە پەرلەمانتاران بۆ دانیشتنى پەرلەمان کاردانەوەى لێکەوتەوە.
• بنەماڵەى مەلا شڤان پەرلەمانتارى نەوەى نوێ نیگەرانیان لە بەشدارییەکەى پیشاندا.
• گومان دەکرێت بەشێک لە پەرلەمانتاران لە ژێر هەڕەشە یان پارەدا برابنە پەرلەمان.

سەعید بەرۆشکی، باوکی شڤان سەعید بە کەناڵ8ـى ڕاگەیاند، خێزانەکەیان بە هیچ شێوەیەک ئاگاداری بەشداریکردنی کوبوونەوەی کوڕەکەیان نەبووە و ئەو هەنگاوە بەبێ ڕەزامەندی ئەوان بووە، برایەکیش دەڵێت دەبوو مردن هەڵبژێرێت.

سەعید بەرۆشکی باوکى مەلا شڤان:

• شەوی ڕابردوو زانیومانە شڤان چووەتە شاری هەولێر .
• دەستبەجێ کوڕەکانی دیکەم ڕاسپارد بۆ ئەوەی ڕێگریی لێبکەن.
• داوام لە کوڕەکانم کرد لە دهۆک یان لە خانووەکەی دەستبەسەری بکەن تاوەکو کۆبوونەوەکەی پەرلەمان کۆتایی پێدێت.
• بەڵام کاتێک چوونەتە شوێنی نیشتەجێبوونی لە ماڵەوە نەبووە.
• بەهۆی بەشداریکردنی کوڕەکەمان لە پەرلەمان وەک خێزانەکەمان زۆر نیگەران و بێتاقەت بووین.

ئەیهان سەعید براى مەلا شڤان:

• ئەوەى کردوویەتى تەسلیمبوونە بە ئیرادەى پارتى.
• سەربارى ئەوەى هەڕەشە و دەستبردن بۆ ژیانى تایبەتى هەبووە، دەبوو مەلا شڤان مردن هەڵبژێرێت نەک تەسلیمى ئیرادەى پارتى بێت.
• هەڵوێستەکەى شەرمەزارى دەکەین و بە هیچ جۆرێک لەگەڵیدا نین.

مەلا شڤان یەکێکبوو لە دەستگیرکراوانى بادینان کە لەلایەن پارتى دیموکراتى کوردستانەوە دەستگیرکران و دواتر لە هەڵبژاردنى پەرلەمان وەک پەرلەمانتارى خولى شەشەم هەڵبژێردرا.