سەرۆکى ئەنجوومەنى پارێزگاى میسان پەیامێک ئاڕاستەى عەلى زەیدى دەکات
- فەرمانى دەستگیرکردن بۆ مستەفا دەعیر دەرچووە.
- ناوبراو هەڕەشەى ئەوەى کرد بوو ئەگەر دەروازەى شەیب نەکرێتەوە میسان لە عێراق دادەبڕن.
- حکومەتى زەیدى لە 20ـى مانگەوە دەروازەى شەیبى لەگەڵ ئێران داخستووە.
مستەفا دەعیر، سەرۆکى ئەنجوومەنى پارێزگاى میسان لەبارەى فەرمانى دەستگیرکردنییەوە پەیامێکى بۆ عەلى زەیدى نارد و گوتى “پێویست ناکات فەرماندەیى ئۆپراسیۆنەکان ڕابسپێردرێت بۆ دەستگیرکردنم، خۆم دەچمە بەردەم دادگا”.
مستەفا دەعیر، سەرۆکى ئەنجوومەنى پارێزگاى میسان:
- من تاوانبار نیم و نوێنەرایەتى دەسەڵاتى تەشریعى دەکەم لە پارێزگاى میسان.
- من پیاوى دەوڵەتم و کوڕى هۆزێکى گەورە و ڕەسەنم و ئەندامى لایەنێکى سیاسى و جیهادى بەڕێزم.
- ڕژدم لەسەر بەرگریکردن لە مافەکانى خەڵکى میسان و داخستنى دەروازەى شەیب ڕەتدەکەمەوە.
- خۆم دەچمە بەردەم دادگا و متمانەى تەواوەتیم بە دامەزراوە دادوەرییەکان و دادپەروەرییان هەیە.
پەیامەکەى سەرۆکى ئەنجوومەنى پارێزگاى میسان دواى ئەوە هات کە ڕۆژى دووشەممە دادگاى کەرخ فەرمانى دەستگیرکردنى بۆ ناوبراو دەرکرد بە تۆمەتى هەڕەشەکردن لە حکومەت و ئەنجامدانى مانگرتنى گشتى و دابڕانى پارێزگاکە لە عێراق لە ئەگەرى نەکردنەوەى دەروازەى شیبی نێوان ئێران و عێراق لە ماوەى تەنیا سێ ڕۆژى داهاتوودا.
