وه‌فدی خانه‌قین یاداشتێكی 12 خاڵی گه‌یانده لێپرسراوانی باڵای عیراق
وه‌فدێكی باڵای خانه‌قین به نوێنه‌رایه‌تیی پێكهاته‌كان و حزبه سیاسییه‌كان و چالاكوانانی شاره‌كه، له به‌غدا له‌گه‌ڵ لێپرسراوانی باڵای عیراقدا كۆبوونه‌وه و له رێگه‌ی یاداشتێكی 12 خاڵییه‌وه، داواكارییه‌كانی سنووره‌كه‌یان خسته‌ڕوو. له‌وباره‌یه‌وه كاروان یاروه‌یس لێپرسراوی مه‌ڵبه‌ندی خانه‌قینی یه‌كێتیی نیشتمانیی كوردستان به كوردستانی نوێ-ی راگه‌یاند: ناوه‌ڕۆكی یاداشته‌كه، ره‌نگدانه‌وه‌ی خواستی راسته‌قینه‌ی خه‌ڵكی خانه‌قین و ناوچه دابڕێنراوه‌كانه، وتیشی: داوامانكردووه به‌ڕێوه‌بردنی دۆسێی ئه‌منیی خانه‌قین، ته‌نیا له‌لایه‌ن ده‌زگا ئه‌منییه ره‌سمییه‌كانه‌وه بێت و رێگریی بكرێت له هه‌ر ده‌ستوه‌ردانێكی لاوه‌كی، هه‌روه‌ها داوای پێكهێنانی ئیداره‌یه‌كی مه‌ده‌نیی هاوبه‌ش كرا بۆ دۆسێی سه‌ربازیی له خانه‌قین و ناوچه‌كانی دیاله كه مادده‌ی 140 ده‌یانگرێته‌وه.
لێپرسراوی مه‌ڵبه‌ندی خانه‌قین راشیگه‌یاند: پێویسته نووسینگه‌ی مادده‌ی 140 كارابكرێته‌وه، بڕیاری گۆڕینی ناحیه‌كانی قه‌ره‌ته‌په و جه‌له‌ولاش بۆ قه‌زا رابگیرێت، ئاماژه‌ی به‌وه‌شدا كه پێویسته بازگه‌ی گومرگی باوه مه‌حمود لاببرێت و وتیشی: پێویسته گواستنه‌وه‌ی ناسنامه‌ی نیشتمانی، فۆرمی خۆراك و كارتی نیشته‌جێبوون بۆ ناوچه‌كه رابگیرێت و بڕیاره‌كانی ته‌ملیككردنی زه‌وییه كشتوكاڵییه‌كان سڕبكرێن، ئه‌وه‌شی خسته‌ڕوو: ته‌رخانكردنی بودجه‌ی تایبه‌ت بۆ خانه‌قین مافێكی ره‌وایه و به‌پێویستیشی ده‌زانین وه‌زاره‌تی خوێندنی باڵای عیراق دان به زانكۆی گه‌رمیاندا بنێت، كه سێ كۆلێژی زانكۆكه له خانه‌قینن
