گەیشتنی 500 ملیۆن دۆلاری کاش و لێکتێگەیشتنی تاران و واشنتن بەهای تمەنی بەرزکردەوە
بڕێک لە دۆلاری ئەمریکی
پووختەی هەواڵەکە:
- بڕی 500 ملیۆن دۆلاری کاش لە ئەمریکاوە گەیشتە عێراق، ئەمەش هیوای ئاساییبوونەوەی بەهای دیناری لای هاونیشتمانییان دروست کردووە.
- بەهای 100 دۆلار بەرامبەر 152 هەزار و 250 دینارە، لە کاتێکدا هەفتەی ڕابردوو 150 هەزار و 750 دینار بوو.
- تمەنی ئێرانی بەهۆی لێکتێگەیشتنە نوێیەکانی واشنتن و تاران بەرزبووەوە و 100 دۆلار بە 15.2 ملیۆن تمەن مامەڵەی پێوەدەکرێت.
- لە ماوەی دوو ساڵدا تمەن 140%ی بەهاکەی لەدەستداوە، کە لە کاتی دەستبەکاربوونی پزیشکیاندا تەنیا 7.5 ملیۆن تمەن بوو.
بارێکی نوێی دۆلاری کاش بە بڕی 500 ملیۆن دۆلار لە ئەمریکاوە گەیشتووەتە بەغداد، ئەمەش هاوکاتە لەگەڵ ئارامبوونەوەی دۆخی سیاسی و سەربازیی ناوچەکە و لێکتێگەیشتنی نوێی نێوان ئێران و ئەمریکا کە کاریگەریی ڕاستەوخۆی لەسەر بازاڕەکانی دراو دروست کردووە.
دۆخی دینار و گەیشتنی دۆلاری کاش:
هەواڵی گەیشتنی 500 ملیۆن دۆلار وەک بەشێک لە پارەی فرۆشتنی نەوتی عێراق گەیشتووەتە بەغداد، ئەمەش یارمەتیدەر دەبێت بۆ کۆنترۆڵکردنی نرخ.
بەهای دینار جێگیر نییە؛ 100 دۆلار لە بازاڕەکاندا بە 152 هەزار و 250 دینارە، کە بەراورد بە هەفتەی ڕابردوو ڕووی لە بەرزبوونەوە کردووە.
کردنەوەی گەرووی هورمز بۆ عێراق گرنگییەکی زۆری هەیە بۆ زیادکردنی هەناردەی نەوت و گەیشتنی دۆلاری زیاتر بە وڵاتەکە.
هێشتا بازرگانانی هەرێمی کوردستان بۆ هاوردەکردنی کاڵاکانیان بە شێوەیەکی بەرفراوان پەنا بۆ بازاڕی ئاوگۆڕی دراو دەبەن.
بەرزبوونەوەی بەهای تمەن و کاریگەرییەکانی:
بەپێچەوانەی دینار، تمەنی ئێرانی بەرزبووەوە؛ ئێستا 100 دۆلار بە 15 ملیۆن و 200 هەزار تمەنی کاش و 18 ملیۆن و 700 هەزار تمەنی حەواڵە مامەڵەی پێوەدەکرێت. لابردنی بەشێک لە سزاکانی وەزارەتی گەنجینەی ئەمریکا لەسەر دامەزراوەکانی ئێران و وەستانی ئەگەری جەنگی بەرفراوان هۆکاری سەرەکیی ئەم باشتربوونەی تمەنن. بەڵام مامەڵەکارانی دراو هۆشداری دەدەن کە دۆخەکە هێشتا نادیارە، چونکە تمەن لە ماوەی دوو ساڵی ڕابردوودا 140%ی بەهاکەی لەدەستداوە و نرخی ماددە خۆراکییەکان لە ناوخۆی ئێراندا 90% بەرزبووەتەوە، بۆیە کاتی دەوێت تاوەکو تمەن بگاتەوە ئاستی پێش جەنگ.
