ئۆجەلان گواسترایەوە بۆ شوێنێکى نوێ لە ئیمراڵى
پووختەی هەواڵەکە
- عەبدوڵا ئۆجەلان ڕێبەرى زیندانیکراوى پارتى کرێکارانى کوردستان گواستراوەتەوە بۆ شوێنێکى نوێ لە ئیمراڵى.
- ئەندامێکی شاندى ئیمراڵى دەڵێت، پرۆسەى ئاشتى دوو مانگە وەستاوە و پێویستە لیژنەى ئاشتى سەردانى ئیمراڵى بکات.
میدحەت سانجار، ئەندامى شاندى ئیمراڵى، لە دیمانەیەکدا لەگەڵ کەناڵى میدیا هابەر، ئاماژەى بەدوایین پەرەسەندنەکانى پرۆسەى ئاشتى و کۆمەڵگەى دیموکراتى لە تورکیا کرد و ئاشکرایکرد، عەبدوڵا ئۆجەلال گواستراوەتەوە بۆ شوێنێکى نوێ لە گرتووخانەى ئیمراڵى.
میدحەت سانجار، ئەندامى شاندى ئیمراڵى
- پرۆسەى ئاشتى ماوەى دوو مانگە وەستاوە و وادەى نوێ دیاری کرا بەڵام جێبەجێنەکرا.
- دواى هەنگاوەکانى پارتى کرێکارانى کوردستان، پێویستە لیژنەى ئاشتى و سیاسەت سەردانى ئۆجەلان بکات، تاوەکو پێکەوە هەنگاوى داهاتوو دیارى بکەن، ئەمەش دەبێتە مایەى هێنانە ئاراى کەشێکى نوێ.
- گرەنتى بەرەپێشچوونى پرۆسەکە پێویستى بە هەماهەنگییە لەگەڵ ئۆجەلان.
- پرۆسەى ئاشتى ناتوانێت بە پشت بەستن بە پێشبینى و داواکاریی تاکلایەنە بەردەوام بێت.
- ئەو هەنگاوەى پرسە سەرەکییەکە چارەسەر دەکات دەبێت لەلایەن ئۆجەلانەوە بنرێت.
- پرسەکە ئەستەم نییە، بەڵام بۆ تێپەڕاندنى پێویستە لەسەر دەوڵەت دەستبەردارى هەڵوێستە توند و نەگۆڕەکانى بێت.
عەبدوڵا ئۆجەلان ڕێبەرى پارتى کرێکارانى کوردستان لە 15ـى شوباتى ساڵى 1999 لە ئۆپراسیۆنێکى هاوبەشى دەزگا هەواڵگرییەکانى تورکیا و ئەمریکا و ئیسرائیل لە وڵاتى کینیا دەستگیرکرا و گەڕێنرایەوە بۆ تورکیا، لەو کاتەشەوە تاوەکو ئێستا لە گرتووخانەى ئیمراڵى زیندانی کراوە.
