ئەرشەد ساڵحی داوا دەکات بەپەلە هێزی سەربازی ڕەوانەی کەرکووک بکرێت

ئەرشەد ساڵحی، ئەندامی ئەنجوومەنی نوێنەرانی عێراق، داوا لە فەرماندەی گشتیی هیزە چەکدارەکانی عێراق دەکات، هێزی سەربازیی زیاتر ڕەوانەی کەرکووک بکات و دەڵێت، چالاکی شانە نوستووەکانی داعش لە هەندێک ناوچەی پارێزگاکە زیادیکردووە.

ئەرشەد ساڵحی، لە بانگەوازێکی بەپەلەدا بۆ فەرماندەی گشتیی هێزە چەکدارەکانی عێراق:

• لە هەندێک ناوچەی سەر بە پارێزگای کەرکووک چالاکی شانە نوستووەکانی داعش زیادیکردووە.
• زیادبوونی چالاکییەکانی داعش لەو ناوچانە، لە قۆناغێکی زۆر هەستیاردایە.
• بەپەلە ڕێکاری ئەمنی بگیرێتەبەر بۆ ڕێگەگرتن لەهەر هەوڵێک ببێتە مایەی تێکدانی سەقامگیریی ناوچەکە.
• متمانەمان بە هێزە ئەمنی و سەربازییەکانی پارێزگاکە هەیە، بەڵام داوا لە فەرماندەی گشتیی هێزە چەکدارەکان دەکەین، پاڵپشتی و هێزی زیاتری سەربازی بەپەلە ڕەوانەی دەوروبەری کەرکووک بکات.
• ئۆپراسیۆنە ئەمنییەکان بۆ ڕاوەدوونانی شانەکانی داعش زیاد بکرێن.

جموجووڵى داعش

ئەم بانگەوازەى ئەرشەد ساڵحی لەکاتێکدایە، لە چەند ڕۆژی ڕابردوودا چەکدارانی داعش لە سنووری شارۆچکەی حەویجە چەند هێرشێکیان بۆسەر هێزە ئەمنی و سەربازییەکان ئەنجامدا و کوژراو و بریندار هەبووە.

بەهۆی زیادبوونی چالاکییەکانی داعشەوە، لە چەند ناوچەیەکی سەر شارۆچکەی حەویجە و داقوق، شەوان قەدەغەی هاتوچۆ ڕاگەیێنراوە.