خاتوو گەلاوێژ ساڵح؛ ئەستێرە درەوشاوەکەی نێو ئاسمانی دلێران
خاتوو گەلاوێژ ساڵح؛ ئەستێرە درەوشاوەکەی نێو ئاسمانی دلێران
خاتوو گەلاوێژ ساڵح فەتاح خاوەن کەسایەتیەکی باڵایەو لە جەوهەری خۆیدا خۆی بۆ خۆی خاوەن هەگبەیەکی دەوڵەمەندی خزمەتە بە رەوتی رۆشنبیری و فەرهەنگی گەلەکەی ، ئەو ژنەی رەگی لە باکور داچەقیوەو قەدی خەباتی لە باشور بەستراوەتەوە بە خاکی پیرۆزو فیداکارییەوە؛ لە رێگەی نووسین و رەوتی ڕۆشنبیر و تێکۆشان بووە ناوێکی دیار؛ کە ژیانی خۆی بۆ بواری فەرهەنگ، خەباتی نیشتمانی و ئەدەبیاتی کوردی بەخشی و بەشدارێکی جددی خەباتی رەوای گەلەکەی بووەو بەژیانێکی سەختدا تێپەڕیوە .
خاتوو گەلاوێژ هاوژینی ڕووناکبیر و سەرکردەو رێبەری گەورەی گەلی کورد، مامۆستا ئیبراهیم ئەحمەد-دە.
لە تەمەنێکی جەوانیدا (ساڵی ١٩٤٧) ژیانی هاوبەشی لەگەڵ مامۆستا ئیبراهیم پێکهێناوەو کە بۆ ماوەی زیاتر لە نیو سەدە، بووە پێشەنگ و هاوسەنگەری کاروانی فکری و سیاسی ئەو رێبەرە خۆنەویستەی گەلی کورد .
پێگەیشتن و کاریگەریی ژینگەی نیشتمانی خاتوو گەلاوێژ لە خێزانێکی نیشتمانپەروەر و خەباتگێڕدا پەروەردە بووە. ئەم پاشخانە فکرییە، لەگەڵ کاریگەریی ڕاستەوخۆی دیدگا، پێشکەوتنخوازانەی مامۆستا ئیبراهیم ئەحمەد و خاڵە حەمزە عەبدوڵا، یارمەتیدەرێکی گەورە بوون بۆ پەرەپێدانی کەسایەتیی ئەدەبی و فەرهەنگی خاتوو گەلاوێژ .
ئەو توانی لە ژێر سەیوانی ئەم ژینگە دەوڵەمەندەدا لەناو جەرگەی خەباتدا ، دەنگی تایبەتی خۆی لە ناو کایەی ڕووناکبیریی کوردیدا بڵندبکاتەوەو سەدا داربێت بۆ ئەوانی تریش .
ڕەنگدانەوەی خەبات و ناسنامە لە نووسینەکانی خاتوو گەلاوێژ دا خۆیان لە چیرۆک، ڕۆمان، هۆزان و وتاردا دەبینێتەوە ئەوەش تەنیا دەقی ئەدەبی سادە نیین؛ بەڵکو ئاوێنەی ژیانی کوردەوارین و شاکارێکن لە وێنەیەکی ڕاستەقینە و زیندوو لە دابونەریت، کێشە کۆمەڵایەتییەکان و ژیانی ڕۆژانەی گەلی کورد کە لە رێگەی نوسینەوە دەردەکەون .
ڕەهەندی کوردایەتی و خەبات و گێڕانەوەی چیرۆکی قوربانیدانی گەلی کورد، ئازارەکانی ئاوارەیی، و بەرگریی لە پێناو ئازادی، هێڵێکی سەرەکی بەرهەمەکانی ئەم خاتوونەن .
پرسی رەوای ژنان و کارکردن بۆ ئەو دۆزە وایکرد کە گەلاوێژ وەک ژنە نووسەرێکی پێشەنگ، هەمیشە تیشکبخاتە سەر پێگەی ژنی کورد و پێویستی ڕزگاربوونی لە کۆتوبەندی و هێزی ناڕەوای پیاوسالاری و فشارەکانی کۆمەڵگە کە ئەوکات زۆر بوون.
هاوسەنگی لە نێوان دایکایەتی و تێکۆشاندا .. گرنگیی کەسایەتیی خاتوو گەلاوێژ دەردەخات کە سەرەڕای سەختییەکانی ژیانی سیاسی و پێشمەرگایەتی و تەڤلی بوون بۆ ناو بێشەی خەبات، ئاوارەیی، و بەرپرسیارێتیی قورسی دایکایەتی (لە پەروەردەکردنی نەوەیەکی نیشتمانپەروەر و سەرکردە)، رێگر نەبوو لەوەی کە هەرگیز ڕێگای ڕۆشنبیری و ئەدەبی پشتگوێ بخات و توانی داهێنەرانە ووشەکانی بکاتە ناونیشانی ژیان و فیداکاری و کۆڵنەدانی گەلەکەی .
ئەو سەلماندی کە ژنی کورد دەتوانێت لە یەک کاتدا هاوسەنگەرێکی بەهێزی نێو شۆڕش بێت و دایکێکی دڵسۆز، و داهێنەرێکی بواری ئەدەبیش بێت .
خاتوو گەلاوێژ بە تێکۆشانە بەردەوامەکەی توانی ڕێچکەیەکی تایبەت بۆ خۆی بکاتەوە و ببێتە سیمبولێکی درەوشاوەی ئاسمانی فەرهەنگی کورد.
بەرهەم و خزمەتە گەورەکەی، ئێستا بەشێکی گرنگ و دانەبڕاون لە میراتی فکری ئەو خاتوونە .
ناو پێگەی هەمیشە لە مێژووی ڕووناکبیریی گەلی کورد-دا بە ڕێز و شکۆمەندییەوە دەهێنرێت .
